Prezident Shavkat Mirziyoyev 13-fevral kuni ijtimoiy sohalarga masʼul rahbarlarni qabul qildi.

Unda taʼlim va tibbiyot sifati, ilm-fan va madaniyat rivoji, yoshlar hayoti kabi sohalardagi ustuvor vazifalar muhokama qilindi.

Taʼkidlanishicha, 2023-yildan boshlab oʻquvchilarni ikkita xorijiy til va bitta kasbga oʻrgatish Maktabgacha va maktab taʼlimi vazirligining eng ustuvor vazifasi boʻladi.

Bundan tashqari, institut va universitetlarning faoliyati isloh qilinib, malakali kadrlar tayyorlash, ilm bilan ishlab chiqarish integratsiyasi kengaytiriladi.

Yigʻilishda shuningdek, teatr, musiqa va kino sohalarini rivojlantirish, maqom va baxshichilikni asrab-avaylash muhimligi taʼkidlandi. Xalqimiz madaniyati va tabiat maskanlarini keng targʻib qilib, turistlarga sharoitlarni yaxshilash boʻyicha vazifalar belgilandi.

Qayd etilishicha, bugungi kunda aholining 56 foizida ortiqcha vazn, 30 foizida surunkali kasalliklar bor. Shu bois Oʻzbekistonda “Toʻgʻri ovqatlanish va sogʻlom turmush tarzi” umummilliy harakati boshlanishi maʼlum qilindi.

Shuningdek, tibbiyot taʼlimiga ilgʻor xorijiy tajribani joriy qilish, tizimni raqamlashtirish va tibbiy sugʻurtani yoʻlga qoʻyish orqali xizmat sifatini oshirish boʻyicha koʻrsatmalar berildi.

• Ijtimoiy soha
• Prezident
• Shavkat Mirziyoyev