O‘zbekistonning oltin-valyuta zaxiralari tarixiy rekordni yangiladi. O‘zbekiston Markaziy banki ma’lumotlariga ko‘ra, 2026-yil 1-mart holatiga zaxiralardagi xalqaro aktivlarning umumiy hajmi 77,08 milliard dollarni tashkil etdi.

Ma’lumotlarga ko‘ra, zaxiralar bir oy davomida qariyb 2 milliard dollarga oshgan. Yil boshidan buyon esa ularning hajmi 16,2 foizdan ko‘proqqa ko‘paygan.

O‘sish asosan oltin narxining ko‘tarilishi hamda zaxiralardagi qimmatbaho metall hajmining ortishi bilan izohlanmoqda. Hisobot oyida oltin narxining 5063,45 dollardan 5174,10 dollargacha oshishi zaxiralar qiymatiga qariyb 1,4 milliard dollar qo‘shgan.

Natijada oltinning umumiy qiymati ketma-ket sakkizinchi oy rekord darajaga yetib, 67,67 milliard dollarni tashkil etdi. Bu ko‘rsatkich o‘tgan oyga nisbatan 2,69 milliard dollarga ko‘p. Oltinning fizik hajmi ham 12,8 million troy unsiyadan 13,1 million troy unsiyagacha oshgan.

Shu bilan birga, valyuta zaxiralari qisqarib, 8,83 milliard dollarni tashkil etdi. Xorijiy markaziy banklar hamda Xalqaro valyuta jamg‘armasi hisoblaridagi valyuta zaxiralari 1,2 milliard dollar, xorijiy banklardagi mablag‘lar esa 6,09 milliard dollar bo‘lgan.

Bundan tashqari, xorijiy qimmatli qog‘ozlar qiymati biroz oshib, 1,54 milliard dollarga yetdi. Avvalgi oyda bu ko‘rsatkich 1,536 milliard dollarni tashkil etgan.

• Oltin
• O‘zbekiston