Kecha, 16-fevral soat 21:18 da Qo‘qon shahar, Muqimiy ko‘chasida ko‘p qavatli uy yonayotganligi to‘g‘risida “112” tizimi orqali Farg‘ona viloyati Favqulodda vaziyatlar boshqarmasiga xabar kelib tushgan.

Yong‘in joyiga yong‘in qutqaruv ekipajlari soat 21:23 da yetib borib, yong‘in 21:25 da o‘rab olinib, 21:32 da batamom o‘chirilgan. Bu haqda viloyat FVB axborot xizmati xabar berdi.

Yong‘in gaz va havo aralashmasining chaqnashi oqibatida sodir bo‘lgan bo‘lib, 28-uyning 50 m² maydonda tom va shift qismi hamda uy jihozlari yongan.

“Chaqnash oqibatida 4 nafar fuqaro turli darajada kuyish tan jarohati olib, shahar tibbiyot birlashmasiga yotqizilgan. Ko‘rsatilgan tibbiy yordamga qaramasdan 1 nafar fuqaro vafot etgan”, – deyiladi xabarda.

Hozirda hodisaning sabablari aniqlanmoqda.

• FVB
• Farg‘ona
• Qo'qon
• yong‘in