Samarqand viloyatida 150 tup daraxt noqonuniy kesilgani bo‘yicha chora ko‘rmaslik evaziga pora olgan ekologiya bo‘limi boshlig‘i qo‘lga olindi. Bosh prokuratura huzuridagi Departament ma’lum qilishicha, Jomboy tumani ekologiya va atrof-muhitni muhofaza qilish bo‘limi boshlig‘i J.R. “Zarafshon” MFY hududida kesilgan 150 tup terak yuzasidan to‘plangan hujjatlar bo‘yicha qonuniy chora ko‘rmaslik, tabiatga yetkazilgan zarar miqdorini kamaytirish hamda transport vositasini jarima maydonchasidan chiqarib berish evaziga fuqarodan 11 million so‘mlik kompyuter jamlanmasini olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari olib borilmoqda. Eslatib o‘tamiz, avvalroq Farg‘ona viloyatining Buvayda tumanida ham ekologiya tizimi xodimi 9,5 ming AQSH dollari miqdorida pora olganlikda gumonlanib qo‘lga olingani haqida xabar berilgandi.