Prezident Shavkat Mirziyoyev yoqilg‘i-energetika sohasi investorlar bilan muloqotda O‘zbekiston xalqaro energetika hamkorligida o‘z salohiyatiga tayanib ishtirok etayotganini ta’kidladi. Mamlakatning tabiiy resurslari, sanoat korxonalari, muhandislari va bilimli yoshlari sarmoya hamda ilg‘or texnologiyalar bilan birgalikda yuqori qo‘shilgan qiymat yaratish imkonini berishi qayd etildi.

Davlat rahbari ta’kidlaganidek, “O‘Z” g‘oyasining iqtisodiy mazmuni milliy salohiyatni rivojlantirish, xalqaro hamkorlikda teng huquqli ishtirok etish va umumiy kelajak uchun mas’uliyatni o‘z zimmasiga olishdan iborat.

Energetika loyihalarida mis mahsulotlari, kabellar, transformatorlar, metall konstruksiyalar va qurilish materiallariga talab yuqori ekani qayd etildi. Bu mahalliy ishlab chiqaruvchilar uchun yangi imkoniyatlar yaratishi mumkin.

Prezident mahalliy korxonalar mahsulot sifati, narxi va belgilangan standartlarga muvofiqligi bo‘yicha raqobatlasha olishini ta’kidladi. Energetika loyihalarida mahalliy ishlab chiqarish imkoniyatlaridan foydalanish va milliy sanoat salohiyatini rivojlantirish masalalariga e’tibor qaratildi.