Ijtimoiy tarmoqlarda “Jizzaxda o‘qituvchi “Shuhrat” medali bilan taqdirlanganini paxta dalasida eshitdi” sarlavhasi ostida tarqalgan xabar Odam savdosiga qarshi kurashish va munosib mehnat masalalari bo‘yicha milliy komissiya tomonidan o‘rganildi.

Jizzax shahridagi 22-umumiy o‘rta ta’lim maktabining boshlang‘ich sinf o‘qituvchisi Gulbahor Saidmuradovna Samadova paxta yig‘im-terimida yakshanba kuni qo‘shimcha daromad topish maqsadida ishtirok etayotganligi, uni ushbu ishda qatnashish uchun hech qanday majburlash holati bo‘lmaganligi aniqlangan.

Shu bilan birga, Milliy komissiya xodimlarga ularning funksional vazifalariga kirmaydigan ishlarga jalb qilish holatlarini qonunchilikka zidligini hamda bu ishlar uchun ma’muriy va jinoiy javobgarlik belgilanganligini eslatib o‘tgan.

“Agar Siz majburiy tarzda biror-bir mehnatga jalb etish, munosib mehnat va dam olish sharoitlarini yaratish bilan bog‘liq muammolarga duch kelsangiz, “1176” hamda “1092” raqamli ishonch telefoniga murojaat qilishingizni so‘raymiz”, – deyiladi Milliy komissiya munosabatida.

Eslatib o‘tamiz, Jizzax shahridagi 22-umumiy o‘rta ta’lim maktabining boshlang‘ich sinf o‘qituvchisi Gulbahor Samadovaning 11-sentyabr kuni qabul qilingan “O‘qituvchi va murabbiylar kuni munosabati bilan ta’lim-tarbiya tizimida alohida o‘rnak ko‘rsatgan xodimlardan bir guruhini mukofotlash to‘g‘risida”gi Prezident farmoni bilan davlat mukofotiga – “Shuhrat” medaliga loyiq ko‘rilgan edi. Uning bu xushxabarni paxta dalasida eshitganligi haqidagi videoxabar keng jamoatchilikning e’tirozlariga sabab bo‘lgan.

• Jizzax
• O‘qituvchi
• Paxta