Korrupsiyaga qarshi kurashish agentligi sobiq Jismoniy tarbiya va sport vazirligi mansabdor shaxslarining xatti-harakatlaridan norozi bo‘lib yo‘llangan murojaat bo‘yicha ma’lumot berdi.

Qayd etilishicha, fuqaro M.D. yo‘llagan murojaat bo‘yicha o‘rganish o‘tkazilgan va quyidagilar ma’lum qilingan.

Qayd etilishicha, murojaatda keltirilgan vajlarni xolis o‘rganish maqsadida vakolatli idoralar xodimlaridan iborat ishchi guruh tuzilgan. Ishchi guruh tomonidan sobiq Jismoniy tarbiya va sport vazirligining ayrim mansabdor shaxslari tomonidan bir qator xato va kamchiliklarga yo‘l qo‘yilgani aniqlangan.

Jumladan, 2019-yilda Italiyaning Pediluko shahrida akademik eshkak eshish bo‘yicha o‘tkazilgan turnir hamda o‘quv yig‘ini mashg‘ulotida O‘zbekiston milliy terma jamoasining ishtirokini ta’minlash uchun davlat byudjetidan 334 million so‘m, 20 680 yevro va 1500 dollar ajratilgan. Biroq o‘rganishlar davomida ushbu xalqaro tadbirlar uchun sarflangan mablag‘larni tasdiqlovchi hujjatlar mavjud emasligi ma’lum bo‘lgan.

Shuningdek, 2019-yilda Tokio va Pekin shaharlarida sinxron suzish bo‘yicha bo‘lib o‘tgan xalqaro musobaqalarda ushbu tadbirlarga mas’ullar 1015 dollar miqdorida ortiqcha xarajatga yo‘l qo‘ygan.

Bundan tashqari, vazirlik tomonidan 2020-yilda byudjet mablag‘lari hisobidan sport jihozlari sotib olish uchun “Mashxim” MCHJ, “Arabboy sport” XK va “Sport jihoz lyuks” XKlari bilan 45 ta holatda 15 milliard so‘mlik shartnomalar tuzilgan. O‘rganishda 6 ta shartnoma bo‘yicha sotib olingan 2,9 milliard so‘mlik jihozlarning foydalanish uchun tarqatilganini tasdiqlovchi hujjatlar mavjud emasligi aniqlangan.

O‘rganish yakuni bo‘yicha to‘plangan hujjatlar qonuniy baho berish uchun Bosh prokuraturaga yuborilgan.

• Aksilkorrupsiya
• Jinoyat
• Sport