Xitoyning Xenan provinsiyasida restoranlar tarmog‘i rahbari Ma Yanli yuqori natijalarga erishgan xodimlariga BMW rusumli avtomobillar sovg‘a qildi. Har bir avtomobilning qiymati 300 ming yuan yoki taxminan 45 ming dollarni tashkil etadi. Bu haqda “South China Morning Post” nashri xabar berdi.

Ma’lum qilinishicha, Szyaochjo shahridagi mol go‘shtli xotpot restoranlari tarmog‘i egasi xodimlarining qishning sovuq kunlarida elektr skuterlarda ishga qatnashidan ta’sirlangan. Xususan, sakkiz yildan beri restoranda ishlaydigan Li Sze ismli xodimasining sovuqdan yuzi qizarib, quloqlari binafsha tusga kirgani va qo‘llari muzlab qolganini ko‘rgach, unga avtomobil sovg‘a qilishga qaror qilgan.

Tadbirkor 24-sentyabr kuni bir nechta xodimi bilan BMW avtomobillarini xarid qilishga borgan. Xodimalardan Li Sze oq rangli, Lyu In’in esa kulrang BMW avtomobiliga ega bo‘lgan. Mashinalar yangi egalarining nomiga rasmiylashtirilgan, ular avtomobillar uchun pul to‘lamagan. Shuningdek, sovg‘alar evaziga xodimlardan qo‘shimcha shartnomalar imzolash talab qilinmagan.

“Men o‘zimning mashinamda issiq va qulay sharoitda yura olaman. Nega u ham bunday imkoniyatga ega bo‘lmasligi kerak?” — degan Ma Yanli.

Tadbirkor kompaniya muvaffaqiyati barcha xodimlarning birgalikdagi mehnati natijasi ekanini ta’kidlagan. Umumiy ovqatlanish sohasida 20 yildan beri faoliyat yuritayotgan Ma Yanli xodimlariga avval ham bayramlarda pul mukofotlari va kundalik ehtiyoj buyumlarini sovg‘a qilib kelgan.