Turkiyada sog‘lig‘i yomonlashib, Istanbul aeroportida hushini yo‘qotgan 19 yoshli O‘zbekiston fuqarosi davolanib, Vatanga qaytarildi. Bu haqda O‘zbekistonning Istanbul shahridagi Bosh konsulxonasi 11-oktyabr kuni xabar berdi.

Ma’lum qilinishicha, Turkiyaga ishlash uchun borgan A.S. sog‘lig‘i bilan bog‘liq muammolar sababli mehnat faoliyatini davom ettira olmagan va O‘zbekistonga qaytishga qaror qilgan. U aviachipta xarid qilib, aeroportga kelganida ahvoli keskin yomonlashib, hushini yo‘qotgan.

Fuqaro shoshilinch ravishda Istanbul shahrining Boshakshehir tumanida joylashgan Çam ve Sakura shahar shifoxonasiga olib borilgan va zarur tibbiy muolajalarni olgan. Davolanish xarajatlarining bir qismi Turkiyada yashayotgan o‘zbekistonlik saxovatpesha vatandoshlar ko‘magida qoplangan.

Bosh konsulxona va Migratsiya agentligi fuqaroning holatini nazoratga olib, uning O‘zbekistonga qaytishini tashkil etish bo‘yicha amaliy choralar ko‘rgan. Natijada 19 yoshli yigit tegishli tashkilotlar hamkorligida Vatanga qaytarilgan.