Xitoyda fuqarolarning mamlakatdan chiqishi hamda xorijliklarning mamlakatga kirishi bo‘yicha yangi cheklovlar joriy etildi. Tegishli reglament 15-sentyabrdan kuchga kirgan.

Unga ko‘ra, xorijda huquqbuzarlik sodir etgan yoki eksport nazorati qoidalarini buzgan Xitoy fuqarolarining mamlakatdan chiqishi 6 oydan 3 yilgacha cheklanishi mumkin.

Shuningdek, viza olish yoki chegaradan o‘tishda yolg‘on ma’lumot taqdim etgan xorijliklarning Xitoyga kirishi 1 yildan 5 yilgacha taqiqlanishi mumkin.

Yangi tartib vositachilik xizmatlarini ko‘rsatuvchi shaxslar uchun ham majburiy ro‘yxatdan o‘tishni nazarda tutadi. Noqonuniy faoliyat uchun 750 dollardan 7,5 ming dollargacha jarima belgilangan.

Xitoy Davlat kengashiga ko‘ra, yangi qoidalar mamlakat xavfsizligi va manfaatlarini, shuningdek, mamlakatga kirib-chiqayotgan shaxslarning qonuniy huquqlarini himoya qilishga qaratilgan.