Toshkent viloyatining Chirchiq shahrida 17 yoshli maktab o‘quvchisi Rossiyadan yuborilgan 852,2 gramm gashishni qabul qilib olayotgan vaqtida qo‘lga olindi. Bu haqda Davlat bojxona qo‘mitasi xabar berdi.

Qayd etilishicha, Bojxona qo‘mitasining Kontrabandaga qarshi kurashish boshqarmasi Davlat xavfsizlik xizmati va Ichki ishlar vazirligining tezkor tuzilmalari bilan hamkorlikda tezkor tadbir o‘tkazgan.

Tadbir davomida 2009-yilda tug‘ilgan voyaga yetmagan shaxs Rossiyadan yuborilgan jo‘natmani qabul qilib olayotgan vaqtida ushlangan.

Jo‘natma xolislar ishtirokida ochib ko‘rilganda, uning ichidagi 4 ta konserva qutisiga 852,2 gramm gashish yashirilgani aniqlangan.

Shuningdek, o‘smirning yashash xonadoni ko‘zdan kechirilganda, elektron tarozilar, giyohvandlik vositalarini tarqatishga mo‘ljallangan “zip” paketlar va izolyatsion lentalar topilgan. Ular ashyoviy dalil sifatida olib qo‘yilgan.

Bojxona qo‘mitasi ma’lumotiga ko‘ra, 852,2 gramm gashish o‘rtacha 60 ming dozadan ortiqni tashkil etadi. Ushbu miqdordagi giyohvandlik vositasining qora bozordagi qiymati qariyb 600 ming AQSh dollariga baholangan.

Hozirda holat yuzasidan Bojxona qo‘mitasi tomonidan jinoyat ishi qo‘zg‘atilgan.