Suriya g‘arbidagi Xoms shahridagi harbiy kollejga uchuvchisiz samolyotning hujumi oqibatida 81 kishi halok bo‘ldi, 240 kishi jarohatlangan. Bu haqda Suriyaning mahalliy nashrlariga tayanib mamlakat Sog‘liqni saqlash vaziri Hasan al-Gabbash xabar berdi.

Qarorgohi Buyuk Britaniyada joylashgan Suriya Inson huquqlari observatoriyasi qurbonlar orasida tinch aholi, jumladan, ayollar va bolalar ham borligini aytdi. Suriya Sog‘liqni saqlash vazirligi rahbari olti ayol va olti bola halok bo‘lganiga aniqlik kiritdi. 

Hujum harbiy xizmatchilar va ularning yaqinlari ishtirok etgan bitiruv marosimi vaqtida sodir bo‘lgan. Reuters agentligining yozishicha, marosimda Suriya Mudofaa vaziri Ali Mahmud Abbos ham ishtirok etgan. Ma’lumotlarga ko‘ra, u dron hujumidan bir necha daqiqa oldin tadbirni tark etgan.

Suriya Mudofaa vazirligi hujumda “taniqli xalqaro partiyalar tomonidan qo‘llab-quvvatlangan terrorchilik guruhlari”ni aybladi va hujumga javob berishga va’da berdi. Hozircha hech bir guruh sodir bo‘lgan voqea uchun javobgarlikni o‘z zimmasiga olmadi.

Suriya Tashqi ishlar vazirligi BMT va tashkilot Xavfsizlik kengashini hujumni qoralashga chaqirdi. Suriya hukumati qurbonlar xotirasiga uch kunlik motam e’lon qildi.

• Harbiy
• Kollej
• Suriya
• Terakt