28-fevral kuni O‘zbekiston musulmonlari idorasi raisi, muftiy Shayx Nuriddin Xoliqnazar raisligida Surxondaryo, Samarqand hamda Toshkent viloyatlarida faoliyat yuritayotgan tuman va shahar bosh imom-xatiblari ishtirokida videomuloqot yig‘ilishi bo‘lib o‘tdi. Bu haqda O‘zbekiston musulmonlari idorasi matbuot xizmati xabar berdi.

Muftiy kirib kelayotgan qutlug‘ Ramazon oyi bilan barchani muborakbod etib, bu oyni munosib kutib olish, yuqori saviyada o‘tkazish bo‘yicha bir qator muhim vazifa va topshiriqlarga to‘xtalib o‘tgan.

Yig‘ilishda tashkiliy masalalar ham ko‘rilgan. Surxondaryo viloyati bosh imom-xatibi Aliakbar Sayfuddinov o‘z arizasiga ko‘ra vazifasidan ozod etilib, Termiz shahridagi “Hakim Termiziy” jome masjidi imom-xatibi vazifasida qoldirilgan. Termiz shahri bosh imomi va “Manguzar” jome masjidi imom-xatibi lavozimida ishlab kelayotgan Rasuljon Abdullayev O‘zbekiston musulmonlari idorasining Surxondaryo viloyatidagi vakili, viloyat bosh imom-xatibi vazifasiga tayinlangan.

Toshkent shahar Mirzo Ulug‘bek tumani “Oltintepa” masjidida imom-xatib bo‘lib ishlab kelayotgan Ahmadxon Alimov O‘zbekiston musulmonlari idorasi Samarqand viloyati vakili, viloyat bosh imom-xatibi etib tayinlangan. O‘zbekiston musulmonlari idorasi Samarqand viloyati vakili vazifasini vaqtinchalik bajarib kelgan Yoqubjon Mansurov bosh imom-xatib o‘rinbosari va Samarqand tumani “Xo‘ja Ahrori Valiy” jome masjidi imom-xatibi vazifalarida qoldirilgan.

O‘zbekiston musulmonlari idorasi Toshkent viloyati vakili Jasurbek Raupov ham o‘z ixtiyori bilan lavozimidan ozod etilib, Zangiota tumanidagi “Zangiota” jome masjidi imom-xatibi vazifasida qoldirilgan. Toshkent tumani bosh imomi va mazkur tumandagi “Hasanboy ota” jome masjidi imom-xatibi vazifasida ishlab kelayotgan Doniyor Ikromov O‘zbekiston musulmonlari idorasining Toshkent viloyati vakili, viloyat bosh imom-xatibi lavozimiga tayinlangan.

• Muftiy
• O‘zbekiston musulmonlari idorasi
• Samarqand
• Surxondaryo
• Tayinlov
• Toshkent