“Oxirgi yillarda yangi o‘quv yili boshlanishidan oldin yurtimizning turli hududlaridan ta’lim olish uchun kelgan talabalar va ularning yaqinlari firibgarlar tuzog‘iga tushayotganlik holatlari ko‘paymoqda.

Ushbu holatlar asosan talabalarni arzon narxlarda ijaraga qo‘yish kabi vaziyatlarda uchramoqda. Firibgarlar aslida o‘zlariga tegishli bo‘lmagan uylarning rasmini internetga joylab, go‘yoki “yashash manzili”ni ijaraga berishni taklif qilmoqda. Albatta, bunday arzon narxlardagi takliflarni ko‘rib, xaridor ham qiziqish bildiradi.

Firibgarlar esa, uyni boshqa birovga berib yubormasdan, saqlab qo‘yish evaziga oldindan pul talab qiladi. So‘ralgan miqdordagi pul hisobga o‘tgach, ular xaridor bilan aloqani uzib, uni barcha sahifalarini bloklaydi. Natijada, aldangan fuqarolarga na uy, na yashash manzili qoladi.

Bu borada yurtdoshlarimizga rasman murojaat qilamiz. Hech qachon uyni o‘zingiz ko‘rmasdan turib, oldindan to‘lovni amalga oshirmang. Ijara shartnomasi tuzishni aslo yoddan chiqarmang. Bu jarayonni ham faqat va faqat uyning egasi bilan gaplashgandan so‘ng hal qiling. O‘zingiz to‘liq ishonch hosil qilmaguncha shaxsiy ma’lumotlaringizni begonalarga aslo yubormang.

Bu haqda barcha yaqinlaringizni ogohlantiring. Qonuniy yo‘l orqali harakat qilib, firibgarlar imkoniyat qoldirmang” – deyiladi rasmiy xabarda.

• IIBB
• Ogohlantirish
• Talabalar
• Toshkent