Avvalroq, Toshkent viloyatidagi xonadonlarning birida itlarning so‘yilganligi aks etgan video tarqalgan edi.

Mazkur holat Yuqori Chirchiq tumani IIB tomonidan aniqlanib, voqea yuzasidan qo‘shimcha surishtiruv ishlari olib borildi.

Shundan so‘ng, buni sodir etgan fuqaro 10 sutkaga qamaldi.

Surishtiruvlar natijasida Yuqori Chirchiq tumani “Ahmad Yassaviy” mahallasida yashovchi, 1986 yilda tug‘ilgan fuqaro, B.X. o‘zining yashash xonadonida 25 ta itni sanitariya qoidalariga zid ravishda saqlaganligi va ularni so‘yib kelayotgani aniqlangandi.

“Mehr va oqibat” hayvonlarni himoya qilish jamiyatining ma’lum qilishicha, 11-mart kuni ushbu holat yuzasidan sud majlisi bo‘lib o‘tdi va aybdor shaxsga 10 sutka qamoq jazosi tayinlandi.

Sudda ayblanuvchi B.X. itlarni o‘zi iste’mol qilishi uchun so‘yganini aytgan. Nega uyiga har kuni itlar olib kelingani haqidagi savolga esa javob bera olmagan.

Toshkent viloyati IIBB matbuot xizmati tuman IIB va Veterinariya bo‘limi hamkorligida tegishli hujjatlar rasmiylashtirilib, so‘yilgan itlarning soni va ushbu fuqaroning itlarni so‘yishdan ko‘zlagan maqsadiga oydinlik kiritish jarayoni ketayotganini ma’lum qilgandi.

Volontyorlar 35 ta it va 9 ta kuchukni saqlab qolishga muvaffaq bo‘lgan. 10 ta it “Kavcheg” boshpanasiga, qolganlari esa “Mehr” markaziga o‘tkazilgan.

• IIB
• Toshkent viloyati
• Yuqori Chirchiq