Toshkent viloyatidagi shifoxonada siam egizaklari muddatidan avval, homiladorlikning 33-34-haftasida kesarcha kesish yo‘li bilan dunyoga kelgan. Ular tug‘uruqdan to‘qqiz soat o‘tib, shoshilinch ravishda va mahalliy sharoitda o‘ta murakkab amaliyot orqali ajratib olingan.

Sog‘liqni saqlash vazirligi yuqori texnologik operatsiya besh soat davom etganini ma’lum qildi. Xabarga ko‘ra, operatsiya Respublika perinatal markazi qoshidagi Neonatal xirurgiya markazi rahbari, tibbiyot fanlari doktori, professor Baxtiyor Ergashev boshchiligidagi bir guruh malakali mutaxassislar tomonidan bajarilgan. Sog‘liqni saqlash vaziri Asilbek Xudayarov ushbu chaqaloqlar holidan xabar olgan.

“Bunday o‘ta murakkab amaliyotlar hamma davlatlarda ham amalga oshirilavermaydi. Hatto tibbiyoti taraqqiy etgan mamlakatlarda ham uzoq muddatli tahlillar va katta tayyorgarlikdan so‘ng bajariladi. Chunki bu o‘ta noyob operatsiya. Mana shunday muddatidan avval tug‘ilgan siam egizaklarining shoshilinch ravishda hamda viloyat darajasida muvaffaqiyatli ajratib olinishi mamlakatimiz tibbiyoti yangi bosqichga ko‘tarilganining yorqin dalilidir”, – degan vazir.

Siam egizaklarini ajratib olish operatsiyasida ishtirok etgan bir guruh mutaxassislar vazir vazir tomonidan “O‘zbekiston Respublikasi sog‘liqni saqlash a’lochisi” ko‘krak nishoni bilan taqdirlangan.

Salomatligi yaxshilangan chaqaloqlar va ularning onasiga shifoxonadan uyiga javob berilgan.

• Chirchiq
• Jarrohlik
• Toshkent
• egizaklar