O‘zbekiston Voleybol federatsiyasi mansabdorlari 300 mln so‘mdan ziyod byudjet mablag‘larini o‘zlashtirgani aniqlandi. Bu haqda Bosh prokuratura matbuot xizmati  xabar berdi.

Aytilishicha, Bosh prokuratura tomonidan mutasaddi idoralar bilan birgalikda O‘zbekiston Voleybol federasiyasida byudjetdan ajratilgan mablag‘larning maqsadli ishlatilishi o‘rganilgan.

O‘rganishda, Federasiya mansabdor shaxslari va boshqalar byudjet mablag‘larini juda ko‘p miqdorda talon-toroj qilishgani aniqlandi.

Xususan, sobiq Jismoniy tarbiya va sport vazirining buyrug‘iga asosan, Federasiyaga 54 nafar sportchilar bilan 23 kunlik o‘quv-mashg‘ulot yig‘ini o‘tkazish uchun byudjetdan 445 mln. so‘m ajratilgan bo‘lsada, amalda 10 kun o‘quv-mashg‘ulot yig‘ini o‘tkazilib, 231 mln. so‘m byudjet mablag‘lari o‘zlashtirilgan.

Bundan tashqari, terma jamoa va uning zaxirasi tarkibiga kiritilmagan 29 nafar sportchini turli sport yig‘inlariga yuborilib, 75 mln. so‘m mablag‘lar asossiz sarflangan.

Tergovga qadar tekshiruv davomida byudjetga yetkazilgan zararning 120 mln. so‘mi qoplanishi ta’minlandi.

Xabarga ko’ra, mazkur holatlar bo‘yicha jinoyat ishi qo‘zg‘atilib, dastlabki tergov harakatlari olib borilmoqda.

• Aksilkorrupsiya
• Voleybol