O‘zbekistonda hali to‘liq qurib bitkazilmagan va foydalanishga rasman topshirilmagan ko‘p qavatli uylarga fuqarolarni ko‘chirib kiritgan mas’ul shaxslarni jinoiy javobgarlikka tortish taklif etilmoqda. Bu masala Oliy Majlis Qonunchilik palatasining navbatdagi majlisida muhokama qilindi. Qayd etilishicha, ayrim qurilish obyektlarida bino hali to‘liq bitkazilmagan va foydalanishga qabul qilinmagan bo‘lsa-da, fuqarolar xonadonlarga ko‘chirib kiritilayotgani kuzatilmoqda.

Mutasaddilarga ko‘ra, bunday holatlar aholi hayoti va sog‘lig‘i uchun jiddiy xavf tug‘dirishi mumkin. Shu munosabat bilan qonunchilikka o‘zgartirish kiritilib, foydalanishga rasman topshirilmagan ko‘p qavatli uylarga fuqarolarni ko‘chirib kiritishga yo‘l qo‘ygan mas’ul va mansabdor shaxslar uchun to‘g‘ridan to‘g‘ri jinoiy javobgarlik belgilash taklif qilinmoqda.

Bundan tashqari, Shaharsozlik kodeksiga buyurtmachi va pudratchilar zimmasiga foydalanishga qabul qilinmagan ko‘p qavatli uylarga aholini ko‘chirmaslik majburiyatini yuklovchi normalarni kiritish ham rejalashtirilgan.