Yevropa Ittifoqi xavfsizlikka tahdidlar sababli Rossiya fuqarolariga ko‘p martalik Shengen vizalari berishni to‘xtatadi. “Hududimizda dronlardan foydalanishning misli ko‘rilmagan holatlari va sabotaj harakatlariga duch kelyapmiz. Fuqarolarimizni himoyalashga majburmiz”, — dedi Yevropa diplomatiyasi rahbari Kaya Kallas.

Yevropa Ittifoqi Rossiya Ukrainada olib borayotgan urush bilan bog‘liq “xavfsizlikka tahdidlar kuchayganini hisobga olgan holda” Rossiya fuqarolariga viza berish qoidalarini kuchaytirishga qaror qildi. Bu haqda 7-noyabr kuni Yevrokomissiya tomonidan e’lon qilingan bayonotda so‘z boradi.

“Rossiya fuqarolari endi ko‘p martalik Shengen vizalarini ololmaydi. Ular Yevropa Ittifoqiga rejalashtirilgan har bir safar uchun yangi viza olish uchun ariza topshirishlari kerak bo‘ladi”, — deyiladi YeK press-relizida. Qaror Viza qo‘mitasida barcha a’zo davlatlar tomonidan tasdiqlandi.

Shu bilan birga, Yevropa Ittifoqi mustaqil jurnalistlar va huquq himoyachilari uchun yangi qoidalardan istisnolarni nazarda tutgan.

“Rossiyaning Ukrainaga qarshi urushi Yevropa xavfsizligiga jiddiy tahdid solib, sabotaj, dezinformatsiya va dronlarning ittifoq hududiga bostirib kirishi xavfini kuchaytirishda davom etmoqda. Yevropa Ittifoqi ushbu noqonuniy tajovuz boshlanganidan beri Rossiya fuqarolari uchun kirish shartlarini izchil kuchaytirmoqda. Viza qoidalarining qo‘shimcha cheklanishi Yevropa Ittifoqi va uning fuqarolari xavfsizligini himoya qilish uchun yana bir zarur qadamdir”, — dedi texnologik suverenitet, xavfsizlik va demokratiya bo‘yicha ijrochi vitse-prezident Xenna Virkkunen.

“Yangi qoidalarga muvofiq, Rossiya Federatsiyasi fuqarolari tomonidan viza olish uchun taqdim etilgan barcha arizalar kuchaytirilgan tekshiruv tartib-taomillaridan o‘tkaziladi va yanada puxta ko‘rib chiqiladi. Bu Shengen hududining yaxlitligi va xavfsizligini ta’minlashga yordam beradi”, — dedi ichki ishlar va migratsiya bo‘yicha komissar Magnus Brunner.

• Rossiya
• Ukraina
• Visa
• Yevrokomissiya
• Yevropa Ittifoqi
• dron