Yurakning oʻng tomonda joylashishi tibbiyotda dekstrokardiya deyiladi va har 100 tadan bir holatda uchraydi. Bunda yurak va katta tomirlar joylashuv oʻrni tananing oʻng tomoniga ogʻgan boʻladi. Mazkur holatda tananing oʻrta chizigʻiga nisbatan simmetriklik saqlanadi.

Odatda, dekstrokardiya hamma juft aʼzolarning oʻng tomonga siljishi bilan qoʻshilib keladi. Holat klinik jihatdan oʻzini namoyon qilmaydi. Bola tugʻilganda tibbiy koʻrik vaqtida, kattalarda esa flyuorografiya, rentgenoskopiya, EKG yoki koʻkrak qafasini boshqa apparatlarda tekshirish chogʻida aniqlanadi.

Dekstrokardiyasi boʻlgan kishilar koʻproq infeksion kasalliklarga uchrashga, ayniqsa, oʻpka va bronxlarni asoratlar qoldiradigan patologiyalarga moyil boʻladilar.

Dekstrokardiyaning aniq xarakterga ega simptomlari yoʻq. Inson bunday anomaliya bilan odatiy hayot tarzini kechirishi va turli kasalliklarga uchrashi mumkin.

Agar dekstrokardiyaga qoʻshimcha tarzda erta bolalik davrida oʻtkir yurak yetishmovchiligiga olib keladigan boshqa simptomlar boʻlsa, u holda tezda tibbiy yordamga shoshilish kerak. Yaʼni:

· Terining koʻkarishi yoki oqarishi, ayniqsa, baqirganda;

· Yaqqol namoyon boʻladigan holsizlik;

· Hansirash;

· Yangi tugʻilgan chaqaloqning terisi va koʻz oqida uzoq vaqt sariqlikning ketmasligi;

· Aritmiyaning boʻlishi yurakda muammo borligini bildiradi.

Bolalik davridagi bu kabi simptomlar bemorni sinchkovlik bilan tekshirishga, sabablarini aniqlashga va muolaja masalasini hal qilishga asosdir. Kattaroq yoshdagi bolalar kardiolog nazoratida va roʻyxatida boʻlib, yilda 3-4-marta tekshiruvdan oʻtadilar.

Sizlarda yuqorida sanalgan alomatlar bezovta qilmagan bo‘lsa, xulosa qilish mumkinki, yuragingiz oʻng tomonda boʻlsa ham, siz sogʻlomsiz deb aytish mumkin.

Yurak dekstropozitsiyasi kasallik emas, balki anatomik oʻziga xoslik. Uni aniqlash uchun shifokor tavsiyasi, yoʻllanmasi kerak. Kattalar tibbiy koʻrik vaqtida, jarrohlik amaliyotlari oldidan bu haqda shifokorni ogohlantirishlari shart. Faol jismoniy harakat qoʻshimcha anomaliyalar yoki kasalliklar boʻlganidagina cheklanadi.

 Nigora Nizomova, kardiolog

• Lifestyle
• Tibbiyot
• qiziqarli
• salomatlik