Ukraina Prezidenti Vladimir Zelenskiy Rossiya Ukrainaga yangi ommaviy hujum tayyorlayotgani haqida razvedka ma’lumotlari mavjudligini bildirdi. Bu haqda u o‘zining Telegram-kanalida ma’lum qildi.

Zelenskiyning aytishicha, Ukraina havo mudofaasini kuchaytirish va yangi vositalar bilan ta’minlash masalasida ittifoqchilari bilan doimiy muloqot olib bormoqda.

«Hozir Rossiya Ukrainaga yangi ommaviy hujum tayyorlayotgani haqida razvedka ma’lumotlari bor», — deb yozdi Ukraina prezidenti.

U Ukraina aholisi har kuni raketa va dronlar hujumi xavfi ostida yashayotganini ta’kidlab, Rossiyaga nisbatan sanksiyalarni yumshatish masalasini muhokama qilish mumkin emasligini bildirdi.

Rossiya qo‘shinlari so‘nggi vaqtlarda Ukraina hududiga dron va raketalar orqali keng ko‘lamli zarbalar bermoqda. Kiyev ma’lumotlariga ko‘ra, hujumlar nafaqat tungi vaqtda, balki kunduzi ham amalga oshirilmoqda.

Shuningdek, Rossiya so‘nggi oylarda reaktiv dvigatelli dronlardan ham foydalana boshlagan. Ukraina tomonining ta’kidlashicha, bunday qurilmalar havo mudofaasi uchun qo‘shimcha xavf tug‘dirmoqda.

Zelenskiy Nyu-Yorkda AQSH Prezidenti Donald Tramp bilan ham uchrashib, Rossiya–Ukraina urushiga barham berish masalasini muhokama qilgan. Tomonlar, jumladan, energetika infratuzilmasiga zarbalarni to‘xtatish ehtimolini ham muhokama qilgan.

Reuters ma’lumotlariga ko‘ra, Rossiya qo‘shinlari Donetsk viloyatida sekin ilgarilayotgan bo‘lsa-da, front chizig‘ida bir necha oydan beri katta o‘zgarishlar kuzatilmagan. Ukraina esa Rossiya hududidagi, jumladan, neft sanoati obyektlariga zarbalar bermoqda.

Zelenskiy, shuningdek, The Wall Street Journal nashriga bergan intervyusida Rossiya prezidenti Vladimir Putin urushda g‘alaba qozonayotgani ham, mag‘lub bo‘layotgani ham yo‘q, degan fikrni bildirgan.

Ukraina prezidentining ta’kidlashicha, Putin hozircha urushni to‘xtatish zarur, degan xulosaga kelmagan.

Eslatib o‘tamiz, avvalroq Ukraina harbiy rahbariyati Rossiya hujumlariga javoban uzoq masofaga harakat qiluvchi qurollardan foydalanish bo‘yicha yangi operatsiyalarni kelishib olganini ma’lum qilgan edi.