Aktrisa Luiza Rasulova xorijiy ijodkorlar tomonidan oʻtkazilgan kastinglarda ham ishtirok etgani, “Muhtasham yuz yil” serialidagi malika Izabella roliga tasdiqlangani haqida gapirdi. Ijodkor rolni qahramon bilan bogʻliq ochiq sahnalar tufayli rad etgan.

“Ukrainada urush boshlanishidan avval “Muhtasham yuz yil” seriali uchun kasting oʻtkazildi. Shu serialdagi malika Izabella roli uchun kastingga borganman. Keyin esa serialda juda ochiq sahnalar boʻlishidan xabar topganman. Bu narsa menga toʻgʻri kelmaydi deb oʻylaganman. Ularga sochlari qora, koʻzlari katta, tashqi koʻrinishi osiyoliklarga xos aktrisa kerak boʻlgan. Mana shu roldan kastingdan oʻtganman. Lekin ularga rad javobini berganman. Ustiga-ustak oʻsha paytlarda yosh edim, hali pasport ham olmagandim. Serial chiqqanidan keyin kuchli serial boʻlganini koʻrib, afsuslanish boʻlgan. Lekin, hammasi yaxshilikka”, dedi aktrisa.

Luiza Rasulova bunday kastingda ishtirok etishning oʻzi katta baxt boʻlganini alohida taʼkidlagan.