OpenAI kompaniyasi ChatGPT platformasiga shaxsiy moliyani boshqarish imkoniyatlarini qo‘shganini ma’lum qildi.

Yangi “Moliya” bo‘limi orqali foydalanuvchilar bank hisoblarini chat-botga ulab, daromad va xarajatlarini kuzatishi, jamg‘arma va investitsiya rejalarini tuzishi mumkin bo‘ladi.

Hozircha ushbu funksiya AQSHdagi ayrim Pro obunachilari uchun veb-versiya va iOS tizimida sinov tariqasida ishga tushirilgan. Keyinchalik uni Plus foydalanuvchilari uchun ham ochish rejalashtirilmoqda

OpenAI ma’lumotiga ko‘ra, tizim foydalanuvchining maqsadlari va moliyaviy ustuvorliklari asosida tavsiyalar beradi. ChatGPT xarajatlarni optimallashtirish, investitsiya xatarlarini baholash hamda uzoq muddatli moliyaviy reja tuzishda yordam berishi mumkin.

Yangi xizmatda GPT-5.5 modeli qo‘llanilayotgani qayd etildi.

Shuningdek, ChatGPT Plaid platformasi orqali 12 mingdan ortiq moliyaviy tashkilotlarni qo‘llab-quvvatlaydi. Kelgusida Intuit platformasi bilan integratsiya ham yo‘lga qo‘yilishi mumkin.

OpenAI foydalanuvchilar ma’lumotlari xavfsizligi ta’minlanishini bildirgan. Qayd etilishicha, ChatGPT bank hisoblaridagi mablag‘larga mustaqil kirish yoki ular bilan operatsiya amalga oshirish imkoniyatiga ega emas.