Samandar Hamroqulov marhum aktrisa Gavhar Sharipova bilan yoshlik davrlarida sevishgani, aktrisa onasiga maʼqul kelmagani uchun unga uylanmagani va sevgisi uchun kurashmagani haqida soʻzlab berdi.

“Oʻsha vaqtlarda yosh boʻlganman, hech narsani oxirini oʻylamasdim. Baribir koʻnglim bor edi, yaxshi koʻrardim uni. U zamonaviy qiz edi, zamonaviy kiyinardi, dunyoqarashi zamonaviy, rus maktabda oʻqigan qiz edi. Onamga koʻrsatganman, ularga maʼqul kelmagan. Ajralishimiz juda qiyin boʻlgan. Juda asabiy boʻlib qolganman, koʻp urushardik, gap tortishib qolardik. Uni koʻp xafa qilardim. Oliygohni bitirganimizdan keyin hamma har qayoqqa tarqalib ketdi, u ham oila qurdi. Konsertlarga, toʻyga xizmatga borgan vaqtimizda uchrashib qolsak, meni koʻrishi bilan darrov boshqa yerga chiqib ketardi, berkinib olardi. Shundan bilardim mendan qattiq xafa ekanligini. Men u bilan hammasini gaplashib olganman. Bilasizmi, baribir aybdor his qilaman oʻzimni, oʻtib qolganida juda qiynaldim. Hozirgacha namozlarimda haqqiga duo qilaman. Juda yaxshi, chiroyli, aqlli qiz edi. Yozadigan sheʼrlari odamni yigʻlatardi. Koʻp kitob oʻqirdi, dunyoqarashi keng edi. Har qancha sevsa arziydigan qiz edi. Ikkalamizning ham oʻzimizga yarasha xatolarimiz boʻldi, lekin koʻp xato mendan oʻtdi. Kurashishim kerak boʻlgan narsalar bor edi, lekin men kurashmadim”, dedi ijodkor.

Samandar Hamroqulov Gavhar Sharipova uchun kurashmasdan qoʻrqoqlik qilgani va mana shu narsa uning xatosi boʻlgani haqida aytib oʻtdi.