23-24 октябрь кунлари АҚШ Халқаро тараққиёт агентлиги (USAID) маъмури Саманта Пауэр Ўзбекистонга келади. Бу ҳақда агентлик матбуот хизмати хабар бермоқда.

Хабарга кўра, АҚШ Халқаро тараққиёт агентлиги маъмури Минтақавий алоқалар бўйича C5+1 форматидаги (Марказий Осиё мамлакатлари + АҚШ) вазирлар конференциясини ўтказади ҳамда “АҚШ ҳукуматининг минтақа давлатларининг мустақиллиги, суверенитети ва фаровонлигига содиқлигини тасдиқлайди”.

Маълумот учун, 2015 йилдан буён “C5+1” мулоқоти АҚШ ҳукуматининг Қозоғистон, Қирғизистон, Тожикистон, Туркманистон ва Ўзбекистон билан ўзаро ҳамкорлик қилиш учун асосий дипломатик платформаси бўлиб келмоқда.

Тараққиёт масалалари бўйича вазирлар учрашуви минтақавий ўзаро алоқалар, савдо, иқтисодий ўсиш ва тадбиркорлик, иқлимий ва энергетик ечимлар, шунингдек, ёшлар учун имкониятларга урғу қаратган ҳолда Марказий Осиёда инкльюзив, барқарор иқтисодий тараққиётни рағбатлантириш бўйича аниқ чоралар кўриш учун Марказий Осиёнинг бешта давлат вазирини тўплаган ушбу платформани мустаҳкамлайди.

• АҚШ
• Марказий_Осиё