Alibaba Group акцияларини қайтариб сотиб олиш дастурини 15 миллиард доллардан 25 миллиард долларгача кенгайтираётганини эълон қилди, бу Хитой технологик компанияси учун рекорд даражадаги миқдор. 

Компания Хитой ҳукумати босими остида ўз акциялари нархининг ўсишини қўллаб-қувватлаш мақсадида яна икки йил давомида, 2024 йилнинг мартигача ўз акцияларини сотиб олишни давом эттиради.

Ҳозирги кенгайиш учинчиси. Дастлаб Alibaba акцияларини 6 миллиард долларга сотиб олишни режалаштирган эди. Аммо 2020 йил охирида Хитой расмийлари кутилмаганда биринчи бўлиб Alibaba Group молиявий бўлими бўлмиш Ant Group’нинг IPO’сини бекор қилди, сўнгра интернет гиганти устидан тергов бошлади. Компания акциялари тушиб кетди. Alibaba раҳбариятининг муносабати акцияларни қайтариб сотиб олиш дастурини 10 миллиард долларгача кенгайтириш қарори бўлди.Ўтган йилнинг август ойида эса компания бу миқдорни 15 миллиард долларга оширди. Бироқ бу Alibaba'га ўз акциялари нархини сақлаб қолишда унчалик ёрдам бермади. 

Акцияларни қайтариб сотиб олиш дастурининг навбатдаги кенгайиши эълон қилинганидан сўнг, Alibaba котировкалари Гонконг биржасида 11 фоиздан кўпроққа кўтарилмоқда.

Қайд этиш жоиз, Alibaba Group интернет-тижорат соҳасида фаолият юритади. Корпорация Taobao.com, Tmall, Alibaba.com, AliExpress ва бошқа бир қатор веб-порталларга эга.

• Alibaba
• Хитой