АҚШда президент Дональд Трампнинг Овал кабинети нусхаси яратилиб, Оқ уй яқинидаги «Халқ уйи» музейига жойлаштирилди. Бу ҳақда Associated Press хабар берди.

Музейга ташриф буюрувчилар эндиликда президентнинг иш жойи интерьерига ўхшаш тарзда тайёрланган экспозиция билан танишиши мумкин. Нусха ҳам олтин ҳошияли йирик портретлар, вазалар, олтинранг безаклар ва бошқа декоратив буюмлар билан безатилган.

Музей бошқарув директори Люк Буради раҳбарлигидаги жамоа Трампнинг Овал кабинетидаги 24 та портрет нусхасини тайёрлаган. Портретлар учун рамкалар ҳам асл нусхаларига мос равишда тайёрланган. Дизайнерлар Трамп президентлик биносида бўлмаган вақтда Овал кабинетга кириб, ундаги буюмлар ва безакларни ўрганган.

Мутахассислар айрим буюмларни 3D сканерлаш орқали нусхалаган, Шимолий Каролина ва Калифорниядан келган усталар эса девор безаклари ҳамда портретлар учун рамкаларни тайёрлаган. Музейдаги экспозицияда Овал кабинетдаги каби иккита кўзгу ва Мустақиллик декларациясининг нусхаси ҳам мавжуд.

Трамп иккинчи президентлик муддати бошлангач, Оқ уйнинг ички кўринишини ўз дидига мослаб қайта безатган. У Овал кабинет ҳақида гапирар экан, уни Оқ уйдан кетганидан кейин энг кўп соғинадиган жой сифатида тилга олган.