Болалар омбудсмани жабрланувчи билан учрашиб, унинг аҳволи яхшиланганини билдирди ва суд жараёнида иштирок этишини маълум қилди.

Ангренда вояга етмаган қизнинг оммавий зўрланиши бўйича суд жараёни бошланди. Бу ҳақда Болалар ҳуқуқлари бўйича вакил Сурайё Раҳмонова маълум қилди.

Омбудсман 15 ёшли жабрланувчи даволаётган тиббиёт марказига бориб, у билан юзма-юз суҳбат ўтказди. Суҳбат давомида қизнинг соғлиғи, ота-онаси ва яқинларига бўлган ишончи, шунингдек, даво муассасасидан чиққач ким билан яшашни хоҳлаши ҳақида маълумот олинди.

Расмий маълумотга кўра, жабрланувчининг аҳволи анча яхшиланган: унинг вазни ортган, умумий соғлиги барқарорлашган. Психолог мунтазам ишлаётгани, қиз аста-секин оғир руҳий ҳолатдан чиқиб бораётгани қайд этилди.

Болалар омбудсмани вояга етмаганлар манфаатларини таъминлаш мақсадида суд жараёнларида бевосита иштирок этишини билдирди. Шунингдек, у даволаниш тугагач жабрланувчини хавфсиз оилавий муҳитга жойлаштириш жараёнини кузатишда давом этади.

Эслатиб ўтамиз, ҳодиса шу йил июль ойида содир бўлган. 15 ёшли қиз бир неча эркак, жумладан, қариндоши томонидан узоқ муддат зўравонликка учрагани аниқланган. Ҳолат оғирлашганидан кейин у реанимацияга ётқизилган, тана вазни 28 килограммга тушиб кетган ва юра олмай қолган. Шифокорлар тавсияси билан у Тошкентда даволанишга ўтказилган.

• Ангрен
• Toshkent viloyati
• zo‘ravonlik