АҚШ маъмурияти бошқа давлатлардаги 29 нафар элчиларни чақириб олмоқда. Бу ҳақда АҚШ Давлат департаментининг икки нафар ходимига таяниб, The Associated Press хабар берди.

Уларнинг маълумотига кўра, элчиларга ўтган ҳафта уларнинг ваколат муддати 2026 йил январида тугаши ҳақида хабар берилган.

Уларнинг барчаси АҚШнинг собиқ президенти Жо Байден маъмурияти даврида ушбу лавозимларга тайинланган.Маълум қилишича, лавозимдан чақириб олинаётган дипломатлар дипломатик хизматдан бўшатилмайди, бироқ хоҳлашса, бошқа тайинловлар учун Вашингтонга қайтишлари мумкин.

Давлат департаменти аниқ нечта элчи чақириб олинаётганини очиқламаган, аммо бу ўзгаришларни “ҳар қандай маъмуриятда бўладиган одатий жараён” дея изоҳлаган.

Чақириб олинаётган элчиларнинг катта қисми Африкадан. Ушбу қитъанинг 13 та давлатдаги элчилар алмаштирилади: Бурунди, Камерун, Кабо-Верде, Габон, Кот-д'Ивуар, Мадагаскар, Маврикий, Нигер, Нигерия, Руанда, Сенегал, Сомали ва Уганда.

Кейинги ўринда Осиё турибди. АҚШ элчилари Осиёнинг олти давлатидан чақирилмоқда: Фижи, Лаос, Маршалл ороллари, Папуа–Янги Гвинея, Филиппин ва Ветнам.

Европадан Арманистон, Шимолий Македония, Черногория ва Словакия каби давлатлари элчилари чақириб олинмоқда.

Шунингдек, Жазоир, Миср, Непал, Шри-Ланка, Гватемала ва Суринам ҳам ушбу рўйхатдан жой олган.

• АҚШ
• Байден
• Элчи
• Тайинлов
• Трамп