Жорий йил 12 апрел куни имзоланган Ҳукумат қарори билан Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиш тартиби тўғрисидаги низом билан эндиликда ҳайдовчи ЙПХ ходимининг дислокацияси кўчирмаси билан ўша жойнинг ўзида танишиш имкониятидан маҳрум бўлмоқда.

ИИВ мазкур норма юзасидан изоҳ берди.

Унга кўра, Ички ишлар вазирининг 2018 йил 20 июндаги 168-сон “Йўл-патруль хизмати фаолиятини ташкил этиш тартиби тўғрисидаги йўриқномани тасдиқлаш ҳақида”ги буйруғига асосан постларнинг жойлашуви (дислокация) Қорақалпоғистон ИИВ, Тошкент шаҳар ва Тошкент вилояти ИИББ ҳамда вилоятлар ИИБ бошлиқлари томонидан тасдиқланади ва ҳар чоракда кўриб чиқилади. Ушбу дислокацияда постлар ва йўналишлар белгиланиб, куч ва воситалар тақсимоти кўрсатилади.

Шу билан бирга, дислокацияга кўра ЙПХ ходими патруллик йўналиши маълум постдан ташқари маълум масофадаги йўллар ва бир нечта кўчаларда хизматга жалб қилинган бўлиши мумкин.

“Ҳозирги кунда кўплаб йўл ҳаракати иштирокчилари содир этган ҳуқуқбузарлиги учун жавобгарликдан қутулиб қолиш мақсадида дислокация кўрсатилмади деб важ қилиб, турли инстанцияларга мурожаат қилишади. Дислокация – ички хизматда фойдаланиш учун белгиланган бўлиб, унинг қайси ҳудуд, секторга бириктирилганлиги, ходимнинг раҳбарлари томонидан назорат қилиш учун чиқарилган ҳужжат. Халқаро тажриба ўрганиб чиқилганда, мисол учун АҚШ ва Европа давлатларида йўл ҳаракати хавфсизлиги полицияси ходимидан нафақат дислокация, ваҳоланки гувоҳномасини кўрсатишини талаб қилиш мумкин эмас”, – дейилади вазирлик изоҳида.

Вазирликнинг таъкидича, юқоридагиларни инобатга олиб, мазкур ўзгартириш илғор хорижий давлатлар тажрибасини инобатга олган ҳолда киритилмоқда.

Ўз навбатида, йўл ҳаракати иштирокчилари  ЙПХ ходимининг хатти-ҳаракатидан норози бўлган тақдирда ариза ёки шикоят тарзида юқори турувчи инстанцияларга мурожаат қилиш ҳуқуқига эга.

• ИИВ
• ЙҲҚ
• ЙҲХББ
• қизиқарли