Жорий йилнинг 29-30 апрель кунлари Ўзбекистон ҳукумати делегацияси амалий ташриф билан Хитой Халқ Республикасининг Урумчи шаҳрида бўлди.

Ташриф доирасида Ўзбекистон Республикаси Бош вазири Абдулла Арипов ҳамда Хитой Коммунистик партияси Марказий қўмитаси Сиёсий бюроси аъзоси, Шинжон-Уйғур автоном райони Партқўми котиби Ма Синжуй бошчилигидаги икки мамлакат делегацияларининг учрашуви бўлиб ўтди.

Дастлаб, Ўзбекистон Республикаси Президенти Шавкат Мирзиёевнинг Хитой Халқ Республикаси Раиси Си Сзинпин ҳамда Шуар Партқўми котибига йўллаган самимий саломлари ва эзгу тилаклари етказилган.

Хитой Ўзбекистоннинг ишончли, вақт синовидан ўтган стратегик ҳамкори экани, икки томонлама алоқалар тобора мустаҳкамланиб бораётгани, давлатларимиз ўртасидаги ҳамкорлик барча шароитларда ҳар томонлама стратегик шериклик даражасига кўтарилгани таъкидланган.

Учрашувда томонлар савдо, инвестициявий ва технологик ҳамкорлик ривожланиб бораётгани, инфратузилма, саноат кооперацияси, қишлоқ хўжалиги, “яшил” энергия соҳаларида янги лойиҳалар амалга оширилаётгани натижасида ўтган йили товар айирбошлаш ҳажми 13 миллиард доллардан ошганини билдириб, мамлакатлар раҳбарлари томонидан белгилаб берилган 20 миллиард долларлик кўрсаткичга эришиш учун барча имкониятларга мавжудлигини таъкидланган.

Савдо-саноат, транспорт-логистика, энергетика, қишлоқ хўжалиги, туризм ва таълим соҳаларида кўп қиррали ҳамкорликни кенгайтириш масалалари юзасидан ҳам атрофлича фикр алмашилган.

• Арипов
• Делегация
• Ўзбекистон
• Ташриф
• Хитой