Ереван Анқара билан муносабатларни тўлиқ нормаллаштиришга ва мамлакатлар ўртасида тинчлик ўрнатишга тайёр. Бу ҳақда бугун 15 февраль куни Арманистон ташқи ишлар вазири Арарат Мирзоян Анқарада туркиялик лавозимдоши Мевлут Чавушўғли билан бўлиб ўтган музокарадан сўнг маълум қилди.

"Ушбу зилзилалар натижасида ҳалок бўлганларга ҳамдардлик билдираман ва ярадорлар тезроқ тузалиб кетишини билдираман. Биз 1988-йилдаги зилзиладан омон қолдик ва Туркия ва унинг халқи ҳозир бошдан кечираётган дардни жуда яхши биламиз. Бундай табиий офатлар бутун инсоният учун фожиадир ва биз бундай вазиятларда гуманитар инқирозларга қарши курашиш учун бирдамлик кўрсатишимиз керак. Туркиядаги ушбу қийин даврда минтақада тинчликни тиклашга, шунингдек, Туркия билан дипломатик алоқалар ўрнатиш учун муносабатларни тўлиқ нормаллаштиришга тайёр эканлигимизга ишонч билдирмоқчиман”, деди у.

2009 йилда Тсюрихда икки давлат ташқи ишлар вазирлари дипломатик муносабатлар ўрнатиш ва муносабатлар тамойиллари тўғрисидаги протоколларни имзолаган, бироқ бу ҳужжатлар томонлар томонидан ратификация қилинмаган. 2018 йил 1 март куни Арманистон протоколлар бекор қилинганини эълон қилди. 2021 йилда Арманистон ва Туркия муносабатларни тартибга солиш учун махсус вакилларни тайинлади. Ҳозирда мамлакатлар муносабатларни нормаллаштириш устида ишламоқда.

• Арманистон
• Дипломатик
• Туркия