Наманган, Самарқанд ва Навоий вилоятларидаги тиббиёт муассасаларида фуқаролардан асоссиз равишда 125 млн сўмдан ортиқ маблағ ундирилгани аниқланиб, уларни қайтариш белгиланди. Бу ҳақда Рақобат қўмитаси хабар берди.

Наманган вилоят болалар кўп тармоқли тиббиёт марказида 2026-йил февраль, март ва апрель ойларида УЗИ хизматлари бўйича 416 нафар истеъмолчидан навбатдаги қиёслов кўригидан ўтказилмаган ҳолда 34,3 млн сўм асоссиз ундирилгани аниқланган.

Самарқанд вилояти Каттақўрғон туман соғлиқни сақлаш бўлимида 2024–2025-йилларда пулли тиббий хизматлар нархини белгилаш тартибига риоя этилмагани сабабли беморлардан қарийб 55,7 млн сўм ортиқча маблағ олингани маълум бўлган. Навоий вилоятидаги Республика ихтисослаштирилган она ва бола саломатлиги илмий-амалий тиббиёт маркази филиалида эса 2023–2025-йилларда қарийб 35 млн сўм ортиқча ундирилгани аниқланган.

Мазкур ҳолатлар юзасидан Наманган, Самарқанд ва Навоий вилояти ҳудудий бошқармалари Махсус комиссиялари томонидан учта тиббиёт муассасасига нисбатан белгиланган тартибда иш қўзғатилган. Аниқланган ортиқча маблағларни фуқароларга қайтариш белгиланган.