Туркияда комик Дениз Кўктош президентни ҳақорат қилиш ва диний қадриятларни очиқчасига ҳақорат қилишда айбланиб, суд қилинадиган бўлди. У 12 йилгача қамоқ жазосига ҳукм қилиниши мумкин. Бу ҳақда «Сöзcü» хабар берди.

Қайд этилишича, Кўктош 3 июль куни қўлга олинган. У 28 август куни озод қилинган, бироқ кейинчалик яна ҳибсга олинган. Комик 88 кунлик вақтинчалик ҳибсдан сўнг 28-сентабр куни суд залига олиб чиқилиши кутилмоқда.

Унга Туркия Жиноят кодексининг 299-моддаси бўйича «президентни ҳақорат қилиш», шунингдек, 216-модданинг 3-қисми бўйича «аҳолининг бир қисми эътиқод қиладиган диний қадриятларни очиқчасига ҳақорат қилиш» айблари қўйилган.

Маълумотларга кўра, жиноят иши Кўктошнинг Истанбулдаги «Ҳарбие Cemil Topuzlu» очиқ ҳаво театрида намойиш этган ва кейинчалик YouTube платформасига жойлаган «Ўлик денгиз» номли стендап дастуридаги сиёсий ҳажвлари сабабли қўзғатилган. Унда Туркия Президенти Ражаб Тоййиб Эрдўған ва диний мавзуларга оид ҳазиллар бўлган.