Ўзбекистонда кўп квартирали уйларни тегишли рухсатномасиз қуриш учун жавобгарлик кучайтирилди. Такроран содир этилган бундай ҳуқуқбузарлик учун 3 йилдан 5 йилгача озодликдан маҳрум қилиш жазоси белгиланди.

Президент 28-сентябрь куни қурилиш соҳасида давлат назорати ва бошқарувини янада такомиллаштиришга қаратилган ўзгартириш ва қўшимчаларни назарда тутувчи қонунни имзолади. Унга кўра, қурилиш-монтаж ишларини бошлаш учун қурилиш ва уй-жой коммунал хўжалиги соҳасида назорат қилиш ҳудудий инспексияларидан рухсатнома олиш талаб этилади.

Жиноят кодексига киритилган ўзгартиришларга мувофиқ, кўп квартирали уйларни тегишли инспексияларнинг рухсатномасисиз қуриш маъмурий жазо қўлланилганидан кейин такроран содир этилса, 3 йилдан 5 йилгача озодликдан маҳрум қилиш билан жазоланади. Шунингдек, шаҳарсозлик тўғрисидаги қонунчиликни бузиш одам ўлимига ёки бошқа оғир оқибатларга сабаб бўлса, 5 йилдан 7 йилгача озодликдан маҳрум қилиш жазоси белгиланди.

Қонун расмий эълон қилинган кундан эътиборан уч ой ўтгач кучга киради. Мазкур қонун лойиҳаси Олий Мажлис Қонунчилик палатасида 13-январь куни биринчи ўқишда қабул қилинган ва Сенат томонидан 9-июлда маъқулланган.