Британиянинг BBC телерадиокомпанияси АҚШ президенти Доналд Трамп томонидан қўзғатилган 10 миллиард долларлик туҳмат даъвосини бекор қилишни талаб қилмоқда. Даъво BBC’нинг “Панорама” ҳужжатли филми билан боғлиқ.

РБС-Украина BBC’га таяниб хабар беришича, телерадиокомпания Флорида штати суди ушбу иш бўйича BBC’га нисбатан шахсий юрисдикцияга эга эмаслигини маълум қилган. Шунингдек, суд мажлиси ўтказилаётган ҳудуд ноўрин экани ҳамда Доналд Трамп ўз даъволарини етарли даражада асослаб бера олмаганини таъкидлаган.

BBC Трамп томонидан ҳеч қандай реал зарар исботланмаганини қайд этади. Компания маълумотига кўра, ҳужжатли фильм намойиш этилганидан кейин Трамп қайта президент этиб сайланган ва Флорида штатида сайловчиларнинг катта қисмининг овозини қўлга киритган. Шу билан бирга, АҚШ президенти “Панорама” филми BritBox платформасида намойиш этилганини иддао қилган, бироқ BBC бу маълумотни асоссиз деб атаган.

Шунингдек, BBC Трамп ҳужжатли фильм “ҳақиқий ёвуз ният билан тайёрланганини” ишончли тарзда исботлай олмаслигини билдирган.

Аввалроқ BBC монтаж масаласида узр сўраган, бироқ молиявий компенсация талабларини қатъиян рад этган ҳамда туҳмат айбловлари учун асослар мавжуд эмаслигини билдирган. Компания, шунингдек, “Панорама” филми АҚШ ҳудудида намойиш этилмаганини ва Трамп шаънига туҳмат қилинмаганини таъкидлаган.

Маълумот учиун, 2025 йил декабрь ойида Доналд Трамп BBC’ни 2024-йилги президентлик сайловларидан бир ҳафта олдин намойиш этилган “Панорама” ҳужжатли филми орқали туҳмат қилганликда айблаб, судга даъво аризаси киритганди.

• Суд
• Телеканал
• Трамп