Жаҳон антидопинг кодексига мувофиқ, спортчи барча мусобақалардан вақтинча четлаштирилди.

Халқаро допинг-тест агентлиги сайтига кўра, бокс бўйича Олимпия ўйинлари чемпиони Лазизбек Мулложоновнинг допинг намунасида тақиқланган модда аниқланган.

Ўзбекистонлик спортчи томонидан жорий йилнинг 11 июнь куни мусобақа вақтидан ташқари олинган намунада мушакларнинг тез ўсиши, куч ва чидамлилигини оширишга ёрдам берувчи синтетик анаболик андроген стероид бўлган метастерон аниқланган.

Мулложонов таҳлил натижаларидан хабардор қилинган ва Б намунасидаги тестни талаб қилиш ҳуқуқига эга. Агар Б намунаси тести А намунасидаги тест натижасини тасдиқласа, иш антидопинг қоидасини бузган деб ҳисобланади.

Агар спортчи қайта тест ўтказишни талаб қилмаса ҳам, қоидабузарлик тасдиқланган ҳисобланади. Мулложоновга ўз тушунтиришини тақдим этиш имконияти берилади.

“Спортчи вақтинчалик дисквалификацияга эътироз билдириш ва уни бекор қилишни талаб қилиш ҳуқуқига эга”, — дейилади баёнотда.

Эслатиб ўтамиз, 2024-йилги ёзги Олимпиада ўйинларида Лазизбек Мулложонов 92 килограмм вазн тоифасида чемпион бўлган эди.

• Антидопинг
• Бокс