Черногория пойтахти Подгорицада Исроилнинг Ғазога уюштирган ҳужумларига норозилик билдириш учун кўп сонли одам йиғилди. Бу ҳақда “Анадулу” хабар берди.

Қайд этилишича, Фаластин Бирдамлик Ҳаракати томонидан уюштирилган намойишга қатнашган юзлаб киши қўлларида Фаластин байроқлари билан Черногория парламент биноси томон йўл олган. Фаластинда Исроил томонидан ўлдирилган аёллар ва болаларнинг фотосуратларини ҳам кўтарган намойишчилар, Черногория ҳукуматидан Исроилга қарши санкциялар жорий этишни талаб қилган. Шунингдек, улар АҚШнинг Подгорицадаги элчихонаси олдида туриб, “Фаластинни озод қилинг” ва “геноцидни тўхтатинг” деган шиорларни айтишган.

Намойиш ташкилотчиларидан бири Петар Маркович парламент биноси олдидаги нутқида Черногория ҳукумати ва парламенти Фаластин билан боғлиқ аниқ қадамлар ташлаши кераклигини таъкидлаган.

Марковичнинг айтишича, Исроил Фаластинда геноцид қиляпти ва Черногория парламенти бу борада қарор қабул қилиши керак. Шунингдек, у Исроилга қурол етказиб беришни тўхтатишга чақирди. Намойишда қатнашган шоир Лейла Касич, Ғазода қон кетаётган пайтда сиёсатчиларни Фаластинга нисбатан сезгирликни оширишга чақирган.

Намойишчилардан бири Элвис Бериша, Фаластин халқининг геноцидга учрагани ҳақидаги ҳақиқатни айтиш зарурлигини таъкидлади.

• Chernogoriya
• norozilik