Ўзбекистонда дуал таълимни ривожлантириш бўйича янги тизим жорий этилмоқда. 2027/2028-ўқув йили якунидан бошлаб олий таълим муассасалари ва буюртмачи корхоналарнинг дуал таълимдаги самарадорлиги бўйича рейтинг юритилади.

Рейтингда талабаларни дуал таълимга қамраб олиш даражаси, уларнинг ўртача иш ҳақи ҳамда ўзлаштириш кўрсаткичларига устувор аҳамият берилади.

Энг юқори натижа қайд этган учта ОТМ ва учта корхона рейтингдаги ўрнига қараб 1, 2 ва 3 миллиард сўмдан рағбатлантирилади.

Шунингдек, 2027 йил 1 январдан бошлаб муҳандислик, ишлаб чиқариш ва ишлов бериш, архитектура-қурилиш ҳамда қишлоқ хўжалиги йўналишларида дуал таълим олаётган талабалар учун корхоналар томонидан тўланган иш ҳақи харажатларининг 50 фоизи субсидия сифатида қопланади.

Корхоналарни дуал таълимга фаол жалб қилиш мақсадида уларга қўшимча имтиёзлар ҳам берилади. Жумладан, ОТМларда амалиёт базасини ташкил этиш учун олиб кириладиган айрим жиҳоз ва ускуналарга 2030 йил 1 январгача 1 фоиз миқдорида божхона божи ставкаси белгиланади.

Бундан ташқари, келаси йилдан «корхона – олийгоҳ – мақсадли кадр» тизими 75 та ОТМда, 2028 йилдан эса барча олий таълим муассасаларида жорий этилиши кўзда тутилган.

Янги ёндашувда иш берувчи корхона ўзига зарур мутахассисни тайёрлаш учун ОТМга буюртма беради. Бу эса таълим жараёнини меҳнат бозори эҳтиёжларига янада яқинлаштиришга хизмат қилиши кутилмоқда.

Шунингдек, ОТМ битирувчиларининг ишга жойлашиш кўрсаткичларини баҳолаш учун «Битирувчи сифати индекси» жорий этилади. Битирувчилари бандлиги бўйича юқори натижа кўрсатган 20 та ОТМга 500 миллион сўмдан ажратилади.

Умуман, янги тизимда дуал таълим самарадорлиги нафақат талабалар сони, балки уларнинг билим даражаси, даромади ва келгусидаги бандлиги орқали баҳоланади.