Боғчаларда ўйин орқали таълим бериш дастури барча муассасаларга жорий этилади

Мактабгача таълим муассасаларида ўйин орқали таълим беришга қаратилган янги дастур йил якунига қадар 38 мингдан ортиқ боғчанинг барчасига жорий этилади. Ҳозирда ушбу методика боғчаларнинг 30 фоизида қўлланмоқда.

Президент Шавкат Мирзиёев «Боғча боланинг қобилияти кашф этиладиган, зеҳни очиладиган масканга айланиши зарур», — деди. Таъкидланишича, Италия, Буюк Британия, Германия, Сингапур ва Хитой тажрибаси асосида миллий қадриятларга мос дастур ишлаб чиқилган. Ҳозирда 180 минг тарбиячи ва педагог янги методика бўйича ўқитилмоқда.

Тошкент шаҳрида UNESCO шафелигида Болаларни эрта ёшдан таълимга жалб қилиш минтақавий маркази ҳамда Италиянинг Режжио Эмилия маркази иш бошлади. Улар халқаро стандартлар ва инновацион ечимларни жорий этиш, шунингдек, ўйин орқали таълим бериш бўйича амалий қўлланмалар тайёрлашга хизмат қилади.

Шунингдек, ҳар йили 50 нафар илғор тарбиячи хорижда стажировка ўташи, барча боғчалар учун 100 та видеоконтент тайёрланиши белгиланган. Уч йиллик дастур доирасида давлат боғчалари электрон доска, компьютер ва рангли принтерлар билан жиҳозланади.