Финляндия ташқи ишлар вазири Элина Валтонен Россия Украинага қарши урушни давом эттираётган бир пайтда Европа Иттифоқи давлатларини Россия фуқароларига туристик визалар беришни тўхтатишга чақирди. Бу ҳақда DW хабар берди.

Валтонен 12 октябрь куни Х ижтимоий тармоғидаги саҳифасида Еврокомиссияга тегишли мурожаат йўллаш ташаббусини илгари суриб, бошқа аъзо давлатларни ҳам уни қўллаб-қувватлашга таклиф қилди.

“Россияликлар Европага келиб, бу ердаги турмуш тарзи ва эркинликлардан баҳраманд бўлаётган бир пайтда, уларнинг мамлакати украиналикларнинг уйларини бомбалаши нотўғри”, — деди Финляндия ташқи ишлар вазири.

Вазирнинг таъкидлашича, Финляндия 2022 йилдаёқ Россия фуқароларига заруратсиз сафарлар учун виза беришни тўхтатган. У ушбу чекловни Европа Иттифоқи миқёсида ҳам жорий этиш зарурлигини билдирган. Шунингдек, Валтонен Россия президенти Владимир Путиннинг яқин атрофидаги шахсларга Шенген визаларини беришни тақиқлаш, россиялик спортчиларга виза беришни чеклаш ва Украинага қарши урушда қатнашган россияликларга нисбатан мавжуд тақиқларни самарали қўллашга чақирган.

Аввалроқ, сентябрь ойида Европа Иттифоқининг ташқи ишлар ва хавфсизлик сиёсати бўйича олий вакили Кая Каллас ҳам Россияга қарши чекловларни кучайтириш, жумладан, туристик визалар сонини камайтириш таклифини билдирган эди. Эстония эса Украинадаги урушда қатнашган собиқ россиялик ҳарбийларга виза беришни тақиқлаш ташаббусини илгари сурган.

Австрия парламенти сайтида келтирилган маълумотларга кўра, 14 октябрь куни Европа Иттифоқи Кенгашида Россияга нисбатан виза сиёсати масаласини муҳокама қилиш режалаштирилган. Ҳозирча Финляндия илгари сурган ташаббуснинг Европа Иттифоқи миқёсида қабул қилингани ҳақида маълумот берилмаган.