Тошкент вилоятининг Чирчиқ шаҳри ва Қибрай туманида гиёҳвандлик воситаларини тарқатиш билан шуғулланган шахслар қўлга олинди. Тезкор тадбирлар давомида жами 4,7 килограмм гиёҳвандлик воситаси мусодара қилинди. Бу ҳақда Ички ишлар вазирлиги хабар берди.

Маълум қилинишича, Чирчиқда 2006 йилда туғилган қиз ва унинг 2008 йилда туғилган вояга етмаган шериги 41 дона ўрамдаги синтетик гиёҳвандлик воситаларини тарқатаётган вақтда ушланган. Шунингдек, вояга етмаган қиз ижарада яшаётган уйда сотиш мақсадида сақланган 1 килограмм 259 грамм синтетик модда аниқланган.

Бошқа бир ҳолатда эса 2009 йилда туғилган вояга етмаган қизни наркотик савдосига жалб қилган шахс аниқланган. Улар 1988 йилда туғилган аёл билан бирга 150 грамм синтетик гиёҳвандлик воситасини яширин жойларга қолдириш орқали тарқатаётган пайтда қўлга олинган. Аёлнинг уйидан 2 килограмм 850 грамм мефедрон, 200 грамм альфа-ПВП, 200 грамм героин ҳамда гиёҳвандлик воситаларини қадоқлашда ишлатиладиган буюмлар ва тарозилар топилган.

Қибрай туманида эса интернет орқали фаолият юритувчи наркодўконга алоқадор шахслар қўлга олинган. Улар тўртта манзилда жами 200 дона ўрамдаги гиёҳвандлик воситаларини яширишга уринган. ИИВ маълумотига кўра, гумонланувчилар Сирдарё, Фарғона ва Наманган вилоятларида яшовчи йигитлар бўлиб, улар орасида талабалар ҳам бор.

Вазирлик маълумотларига кўра, мусодара қилинган гиёҳвандлик воситалари 245 минг дона бир марталик дозага тенг. Ҳозирда интернетдаги наркодўкон фаолиятига алоқадор бошқа шахсларни аниқлаш бўйича тезкор тадбирлар давом эттирилмоқда.