Маълумотларга кўра, Франциянинг “Орано” компанияси Ўзбекистонда уран қазиб олиш ва қайта ишлашга $500 млн.гача сармоя киритади. Бу ҳақда “Верона” Евроосиё иқтисодий форумида Тоғ-кон саноати ва геология вазири Бобур Исломов маълум қилди.

Вазир мамлакат “Орано” билан стратегик шериклик тўғрисида шартнома имзолаганини қайд этди. Франция компанияси ҳозирда геология-қидирув ишларини олиб бормоқда, жорий йил охиригача лойиҳанинг дастлабки техник-иқтисодий асослари ишлаб чиқилади.

“Стратегик келишувда (Навоий вилоятининг Томди туманидаги) иккита қўшимча майдонда бўлиши кўрсатилган, уларда (Орано) геологик қидирув ишларини олиб боради. Барчаси, албатта, техник-иқтисодий асослаш ҳал қилинади, ҳозирча ҳаммаси ижобий кетмоқда. Умумий сармоянинг жами ҳажми шартномада $500 млн.гача қилиб белгиланган”, — деди Исломов.

Вазирнинг қайд этишича, уран ишлаб чиқаришнинг мавжуд ҳажмлари аллақачон савдо бозорларини топган. Ядро ёқилғисини ишлаб чиқариш ҳажми ошиши билан Ўзбекистон нархлар конъюнктурасидан келиб чиқиб экспорт қилиш тўғрисида қарор қабул қилади, дея қўшимча қилди у.

“Уран бўйича ким билан ишлашишимиздан қатъий назар, биз жаҳон нархларига асосланганмиз. Агар нарх кўтарилса, бизда ҳамма нарса формулаларга боғлиқ ва етказиб бериш нархимиз ҳам кўтарилади”, — дея хулоса қилди вазир.

Шунингдек, Исломов жорий йилда барча йўналишларда уран экспорти ошганини маълум қилиб, етказиб беришни диверсификация қилиш муҳимлигини таъкидлади.

Франция президенти Эммануэль Макроннинг мамлакатга ташрифи доирасида “Орано” Ўзбекистонда геология-қидирув ишлари ва уран қазиб чиқариш соҳасида янги лойиҳаларни амалга ошириши маълум қилинганди.

• Fransiya
• Макрон
• Навоий
• Uran