Енгил вазн тоифасида Ultimate Fighting Championship (UFC) промоушени собиқ чемпиони Ҳабиб Нурмагомедов аралаш жанг санъати (ММА) спортидаги фаолиятини якунлади. Бу ҳақда Нурмагомедовга яқин бўлган учта манба маълум қилган.

“Ҳабиб ММА соҳасидан нафақага чиқди. У энди мураббийлик ҳам қилмайди, йиғинда жамоа билан бирга бўлмайди. Бу оила билан кўпроқ вақт ўтказиш мақсадида амалга оширилмоқда”, – дейилади хабарда.

Қайд этиш мумкин, Нурмагомедов 34 ёшда ва 2020 йилнинг октябрида UFC’даги фаолиятини якунлаган. У карьераси давомида 29 жанг ўтказиб, уларнинг барчасида ғалаба қозонган. Сўнгги чемпионлик жанги отасининг вафотидан сўнг ўтказилган ва унда Ҳабиб иккинчи раунддаёқ америкалик Жастин Гэтжини мағлуб этган ва жангдан сўнг фаолияти якунланганини маълум қилган. У ушбу қарорини онасига берган ваъдаси билан изоҳлаган эди.

Россиялик жангчи 2018 йилнинг 7 апрель куни америкалик Эль Яквинтани мағлубиятга учратиб, UFC чемпиони бўлган. Сўнгра камарини ирландиялик Конор Макгрегор, америкалик Дастин Порье ва Жастин Гэтжига қарши уч марта ҳимоя қилган. 2022 йил март ойида доғистонлик спортчи UFC шон-шараф залига киритилди.

Бундан ташқари, жорий йил Ҳабиб учун мураббий сифатида муваффаққиятли ўтди. Унинг жамоадоши Ислам Махачев айнан унинг вазнида UFC чемпионлик камарини қўлга киритди. Шунингдек, унинг жияни Усман Нурмагомедов эса Bellator чемпиони бўлди. Шу сабабдан ҳам “Бургут” ўз устози Хавьер Мендес билан биргаликда 2022 йилнинг энг яхши ММА мураббийи деб топилди.

Эслатиб ўтамиз, янгилик расман тасдиқланмаган бўлса-да, Ҳабиб ўз фан-клуби томонидан эълон қилинган хабарни ўз саҳифасида “репост” қилган.

• Ҳабиб Нурмагомедов
• Спорт
• UFC