1️⃣ Ноқонуний миграцияга қарши курашиш йўналишида Давлат хавфсизлик хизмати ҳамда Бош прокуратура ҳузуридаги Департамент ходимлари ҳамкорлигида Навоий ва Қашқадарё вилоятларида тезкор тадбирлар ўтказилди.

Жумладан, Навоий шаҳрида фаолият юритувчи сайёҳлик фирмаси раҳбари Хатирчи туманида яшовчи, 2006 йилда туғилган фуқаронинг ишончига кириб, барча ҳужжатларни ўзи тайёрлаган ҳолда, уни Болгария давлатига ишга юбориш эвазига 3 минг АҚШ доллари олган вақтида ашёвий далиллар билан ушланди.

2️⃣ Китоб туманида ҳам шу каби ҳолат фош этилди. Хусусан, Тошкент вилоятида яшовчи, 1997 йилда туғилган шахс 2 нафар фуқаронинг ишончига кириб, уларни Исроил давлатига ишлаш учун юбориш ва ишчи визасини ўзининг танишлари орқали тайёрлатиб бериш эвазига 20 минг АҚШ доллари талаб қилган.

Ўтказилган тезкор тадбирда мазкур шахс Қашқадарё вилоятига бориб, сўралган пул маблағи ҳисобидан 5 минг АҚШ долларини олган вақтида ушланди.

Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.

Фуқароларга хорижга ишга юбориш бўйича ижтимоий тармоқлардаги таклифларга нисбатан эҳтиёткорлик билан ёндашишлари, фақат Вазирлар Маҳкамаси ҳузуридаги Миграция агентлиги ёки тегишли лицензияга эга бўлган хусусий бандлик агентликлари хизматларидан фойдаланиш тавсия этилади.

“Ҳурматли фуқаролар, кундалик ҳаётда шу каби қонунбузилиш ҳолатларига дуч келсангиз ДХХнинг 1520 қисқа рақамига қўнғироқ қилиб, хабар беринг. Шахсингизнинг сир сақланиши кафолатланади”, – дейилади ДХХ хабарида.

• Болгария
• ДХХ
• Isroil
• Миграция
• Навоий
• Qashqadaryo
• Toshkent viloyati