Жиззах вилоятида кичик қувватли атом электр станцияси қурилиши бошланди. Бу ҳақда “Узатом” агентлиги хабар берди.

Маълум қилинишича, 15 апрель куни Жиззахда RITM-200N реакторига эга кичик қувватли атом электр станцияси (КҚАЭС) лойиҳасини амалга ошириш доирасида қурилиш-монтаж базаси қурилиши бошланди. Ушбу лойиҳа Россиянинг илғор технологияларини ўзида мужассам этган ҳолда Жиззах туманида жойлашган бўлиб, минтақа энергетика инфратузилмасини ривожлантиришда янги босқични белгилайди.

“Биз ушбу лойиҳа жамият учун юқори даражада очиқлик ва хабардорликни ошириш учун хизмат қилади, деб ишонамиз. Бу эса барча томонлар учун ишонч ва ҳамкорликни мустаҳкамлайди. RITM-200N реакторига эга кичик қувватли атом станцияси синовдан ўтган технологиялар ва авариясиз ишлаш тажрибасига асосланиб, экологик тоза энергиянинг ишончли манбаи бўлади. Ихчамлиги, юқори хавфсизлик даражаси ва самарадорлиги RITM-200N ни минтақа энергетикасини барқарор ривожлантириш учун идеал ечимга айлантиради”, – дейди АЭС қурилиши дирекцияси директори ўринбосари Отабек Аманов.

Россия КҚАЭС лойиҳаси Ўзбекистонни ўнлаб йиллар давомида кафолатланган электр энергияси билан таъминлаши ва минтақа ривожланиши учун энергетик асос бўлиб хизмат қилиши қайд этилган.

• АЭС
• Жиззах
• qurilish