Амалий ташриф билан Афғонистонда бўлиб турган Ўзбекистон ҳукумати делегацияси Кобул шаҳрида ташкил этилган Ўзбекистон-Афғонистон бизнес форуми ҳамда “Маде in Uzbekistan” кўргазмасининг расмий очилиш маросимида иштирок этди.

Кўргазма очилишида Ўзбекистон Бош вазири Абдулла Арипов ҳамда Афғонистон Бош вазири вазифасини бажарувчи Абдул Ғани Бародар бошчилигидаги икки мамлакат ҳукуматлари делегациялари иштирок этди.

Мазкур қўшма бизнес-форум ҳамда Ўзбекистон маҳсулотлари кўргазмаси ўзаро савдо-иқтисодий алоқалар ривожига катта ҳисса қўшиши таъкидланди.

“Маdе in Uzbekistan” Ўзбекистонда фаолият юритаётган корхоналарда ишлаб чиқарилган маҳсулотларни намойиш этиш, экспорт шартномалари тузиш, мамлакатимизнинг экспорт салоҳиятини кенгайтириш ҳамда хорижий ҳамкорлар билан барқарор ва узоқ муддатли ҳамкорликни йўлга қўйиш ҳамда мустаҳкамлаш мақсадида ташкил этилди.

Кўргазмада Ўзбекистонда фаолият олиб бораётган корхоналарнинг текстиль, чарм-пойабзал маҳсулотлари, гиламлар, мева-сабзавотлар, электротехника ва кабель маҳсулотлари, автомобиль ва қишлоқ хўжалиги техникаси, металлургия, нефть-кимё ва бошқа кўплаб турдаги тайёр маҳсулотлари намойиш этилмоқда.

Бундан ташқари, кўргазма доирасида икки мамлакат ишбилармонлари ўртасида учрашувлар ўтказиш, шартномалар тузиш имконияти ҳам мавжуд.

Кобул шаҳрида 17 август куни иш бошлаган “Маdе in Uzbekistan” кўргазмаси 21 августга қадар давом этади.

• Афғонистон
• Арипов
• Бош вазир