Олий суд матбуот хизматининг маълум қилишича, 15 августда бўлиб ўтадиган суд томонларнинг розилигига кўра, очиқ ёки ёпиқ тарзда ўтказилади.

Аввалроқ собиқ депутат ва ҳозирда Экология вазирининг маслаҳатчиси Расул Кушербаев фарзандига алимент тўлашдан бош тортаётгани ҳақидаги хабарлар ижтимоий тармоқларда кенг муҳокамаларга сабаб бўлган эди. Ҳолат бўйича Олий Суд матбуот хизмати расмий муносабат билдирди.

Қайд этилишича, Фуқаролик ишлари бўйича Яккасарой туманлараро судига 2025 йил 26 июнь куни аризачи Ш.И. ариза билан мурожаат қилиб, қарздор Р.К.дан вояга етмаган фарзанди таъминоти учун суд буйруғи чиқаришни сўраган.

Мазкур суднинг 2025 йил 28 июндаги суд буйруғи билан билан аризачи Ш.И.нинг аризаси қаноатлантирилган. Унга кўра қарздор Р.К.дан ундирувчи Ш.И.нинг фойдасига бир нафар 2023 йил 5 октябрь куни туғилган М.К. исмли вояга етмаган қиз фарзандининг таъминоти учун 2025 йил 28 июндан бошлаб у вояга етгунга қадар ҳар ой жами даромадининг 1/4 қисми миқдорида алимент ундирилиши белгиланган.

Шунингдек, қарздор Р.К.дан ундирувчи Ш.И.нинг фойдасига почта харажати ва қарздордан давлат фойдасига давлат божи ундирилиши белгиланган.

Шундан сўнг қарздор Р.К. суднинг 2025 йил 28 июндаги суд буйруғидан норози бўлиб, 2025 йил 21 июль кунида мазкур буйруққа нисбатан эътирознома келтирган.

Суд Фуқаролик процессуал кодексининг 181-моддасига кўра ва бошқа қонуний талаблардан келиб чиқиб, ушбу суднинг 2025 йил 23 июлдаги ажрими билан Р.К.нинг алимент ундириш ҳақидаги суд буйруғини бекор қилиш ҳақидаги аризасини қаноатлантирган.

Шундан сўнг даъвогар Ш.И. фуқаролик ишлари бўйича Яккасарой туманлараро судига 2025 йил 5 август куни жавобгар Р.К.га нисбатан алимент ундириш ҳақидаги даъво аризаси билан мурожаат қилган.

Ушбу даъво ариза юзасидан фуқаролик иши қўзғатилиб, иш юритувига қабул қилинган. Фуқаролик ишини суд мажлисида кўриб чиқиш 2025 йил 15 август кунига соат 16:00 га тайинланган.

• Алимент
• Rasul Kusherbayev
• Суд