Ливия шарқидаги Дерна шаҳрида сув тошқини оқибатида ҳалок бўлганлар сони 5,3 минг кишидан ошди. Бу ҳақда “Al Jazeera” телеканали Ички ишлар вазирлиги маълумотларига таяниб хабар берди.

Маҳаллий Қизил Хоч кўнгиллилари 10 минг киши бедарак йўқолганини маълум қилган. Ҳозирда қутқарув ишлари давом этмоқда.

Хабарга кўра, сел қирғоқ бўйидаги Дерна шаҳрининг чорак қисмини вайрон қилган, у ерда кучли ёмғир туфайли иккита тўғон ёрилиб кетган.

Маълумотларга кўра, Ливиянинг шарқий қисмидаги сув тошқинларига жорий йилнинг 10 сентябрь куни мамлакатни қамраб олган “Daniel” тўфони сабаб бўлмоқда. Табиий офат қирғоқ бўйидаги Жабал ал-Ахдар, Дерна ва Бенғози шаҳарларига зарар етказган. Шундан сўнг минтақада аэропортлар ва денгиз портлари ёпилган.

Айни пайтда шарқдаги Киренаика провинциясининг учта ҳудудида комендантлик соати жорий этилган.

• Ливия
• Қурбон
• сув_тошқини