Беларус президенти Александр Лукашенко мамлакатга меҳнат мигрантларини жалб қилиш тартиби ва уларга қўйиладиган талаблар ҳақида маълумот берди. Унинг айтишича, бу масала Ўзбекистон президенти Шавкат Мирзиёев билан ҳам муҳокама қилинган. Лукашенко Беларуснинг айрим ҳудудларида ишчи кучига эҳтиёж юқори эканини таъкидлаб, ўзбекистонлик мутахассисларни ишга таклиф қилиш бўйича тизим ишлаб чиқилганини маълум қилди.

Беларус раҳбарига кўра, дастлаб номзодлар элчихона орқали сараланади, сўнгра корхона раҳбарлари ўзларига зарур мутахассисларни танлаб олади. Яқин орада қарийб 200 нафар ўзбекистонлик Витебск вилоятида ишлаш учун келиши кутилмоқда. Лукашенко мигрантларни мамлакат бўйлаб эҳтиёж мавжуд ҳудудларга тақсимлаш, уларни уй-жой билан таъминлаш ва Беларус фуқаролари билан тенг ҳуқуқлар яратиш муҳимлигини қайд этди. Шунингдек, у Беларус зарурат туғилганда келаётган ишчиларни қўшимча ўқитиш ва малакасини оширишга ҳам тайёр эканини билдирди. “Фақат келинглар ва ишланглар”, деди Беларус президенти.